სტამბოლი

სტამბოლი, იმ იშვიათი ქალაქების სიაშია, რომელიც წლის განმავლობაში მილიონობით ტურისტს „აიძულებს“ ეზიაროს მის განსაკუთრებულ აზიური და ევროპული კულტურით სავსე, იდენტურ გარემოს.

ეს მომაჯადოვებელი ქალაქი სავსეა არქიტექტურული ძეგლებით. ძველის და ახლის სინქრონული შერწყმა კი, უკვე ჩავლილ წარსულს ჩვენს თვალწინ აცოცხლებს. კოშკები, მეჩეთები, ბოსფორის სრუტე, აზიური სურნელი, ჰელენისტური პერიოდიდან თანამედროვე შედევრებამდე.

სტამბოლში ჩასულებმა, მერვე საოცრებად მოხსენიებული აია სოფია აუცილებლად, რომ უნდა ნახოთ ამაში ორი აზრი არ არსებობს.  გარდა იმისა, რომ სანახაობა სულისშემკვრელია, არანაკლებ მისტიურია თვითონ ნაგებობაც. ადამიანები დიდი ხნის განმავლობაში დაობდნენ – რა იყო აია სოფიას ქვეშ. ლეგენდის თანახმად, როცა ქალაქი ოტომანებმა დაიპყრეს, მღვდელებმა ბიზანტიური იმპერიის რელიქვიები გადამალეს საიდუმლო ოთახებში. სხვები ამბობნენ, რომ იქ თვით ეშმაკია დატუსაღებული. ეს მხოლოდ შეთხზული ისტორიებია, სტამბოლი კი ნამდვილად სავსეა მისტიური ლეგენდებით.

არანაკლებ მნიშვნელოვანია იზნიკური კერამიკული ფილებითა და ვენეციური ვიტრაჟებით გაწყობილი ლურჯი მეჩეთი. დილის 9 საათიდან მზის ჩასვლამდე, ლოცვის დროს, იქ შესვლა ადგილობრივების მოთხოვნით შეუძლებელია.

არ უნდა დაგვავიწყდეს გრანდ ბაზარი „ქალაქი ქალაქში“. რომელიც 66 ქუჩისგან და 4000 -ზე მეტი მაღაზიისგან შედგება. თვალის მომჭრელი ფერები, უამრავი გამოუყენებელი ნივთი, რომელიც მათი ყიდვის სურვილს მაინც გაგიჩენთ. ტანსაცმელი, ფეხსაცმელი, ტრადიციული ნაკეთობები, ჭურჭელი, ტკბილეული, სამკაულები ეს მცირე ჩამონათვალია იმ ნივთების, რასაც ამ უზარმაზარ ლაბირინთში შეხვდებით. მარტივად რომ ვთქვათ, ვაჭრობის მოყვარულებისთვის ნამდვილი სამოთხეა. ფასები არც თუ ისე დაბალია, თუმცა თურქებს უყვართ ვაჭრობა, არც ქართველები ჩამოვრჩებით, ასე რომ არამგონია გულდაწვეტილები დაბრუნდეთ შინ.

აუცილებლად გაისეირნეთ ტაქსიმზე, რომელიც სავსეა მაღაზიებით, კლუბებით, კაფეებით. განსაკუთრებით ლამაზია დეკემბერში. თუმცა მგონია რომ სტამბოლს წელიწადის ნებისმიერი თვე უხდება.

იცოდით რომ თურქები გამოირჩეოდნენ კატების ზედმეტი სიყვარულით?! რაც არ უნდა გასაკვირი იყოს 2012 წელს კატების რიცხვმა ადამიანების რიცხვს გადააჭარბა. თუ სადმე არ გინახავთ კატის სკულპტურა, მას სტამბოლში შეხვდებით. ქალაქში კატა ტობილის ქანდაკება დგას, რომლიც მშვიდი სახით, მჯდომარე პოზაში გაჰყურებს ჰორიზონტს. სკულპტურის დასადგმელად ადგილობრივებს 17000 ხელმოწერა დაჭირდათ.

ალბათ დამეთანხმებით, რომ ბოლო წლებში ისეთი დოზით მივიღეთ თურქული კულტურა, ბევრ ჩვენგანს მოსდომებია ბოსფორის სანაპიროზე გასეირნება, სუსხიან ამინდში, მყუდრო ღია კაფეში დაჯდომა და ჩაის დაგემოვნება. თოლიების გუნდი და განსაკუთრებული მყუდრო ნოსტალგიური გარემო, თითქოს უცხო ქვეყანაში.